Esistial o esal mai esistût l’“Homo furlanus”? Al samearès di sì, stant ae serie televisive “Felici ma furlans” ideade di Alessandro di Pauli e Tommaso Pecile: une produzion gnove e libare di tancj preiudizis su l’identitât dal furlan “sant, onest e lavoradôr”, ch’a met in lûs lis idiosincrasiis e i vizis dal “homo furlanus” dal dì di vuê. E cussì, dopo il sucès de prime stagjon, ch’e à dispopolât sul web, e jè rivade la seconde, simpri ambientade inte Daurman s.r.l., piçule dite patriarcjâl, li che – come ch’a notin i produtôrs – «si vîf cun calme… une calme tipichementri furlane, fate di fadie, pôris e deliris!».
Lis gnovis puntatis de seconde stagjon a vegnaran presentadis Sabide ai 23 di Mai a Osôf li dal gnûf teatri “La corte di Osoppo” a lis 8 e 45 di sere. La iniziative e jè organizade de associazion Friûl Adventurs-Fiore, ch’e fâs part dal Coordenament di Glemone, cu la colaborazion dal grop locâl dal ANA e dal Comitât pe Solidarietât di Osôf.
La jentrade e jè a ufierte libare e ce che si cjaparà sù al sarà destinât a l’Associazion Bambini senza frontiere ch’e cure un progjet par fruts puars in Slovachie.
[Culì il manifest de iniziative]
